විසිතුරු, අලංකෘත, ආටෝපගත නත්තලක් වෙනුවට කිතු සමිඳුන්ගේ ආදරය සියල්ලන් අතර බෙදාහදා ගන්නා සැබෑ නත්තලක අසිරිය විඳීමට එක්වන්නැයි අගමැති දි. මු. ජයරත්න මහතා නත්තල් සුබ පැතුම් පණිවිඩයක් නිකුත් කරමින් ඉල්ලා සිටී.
එම නිවේදනයේ මෙසේද සඳහන් වේ.
ජේසුස් ක්‍රිස්තුස් වහන්සේගේ ජන්මෝත්පත්තියෙන් වසර දෙදහස් දහයකින් පසුව එළඹෙන මේ අසිරිමත් නත්තල ශ්‍රී ලංකාවාසී කිතුනු බැතිමතුන් හට වඩාත් සුවිශේෂී එකක් වනු ඇති බව මාගේ පූර්ණ විශ්වාසයයි. බහුතරයක් කිතුනුවන් වෙසෙන ලෝකයේ දකුණු ආසියානු කලාපය වෙනුවෙන් අතිඋතුම් කාදිනල්වරයෙකු තෝරාපත් කිරීමේදී ශ්‍රී ලාංකික කිතුනු බැතිමතුන්ටත්, පොදුවේ ශ්‍රී ලංකා මාතාවටත්, ගෞරව බහුමානීත්වයක් සළකුණු කරමින් අතිඋතුම් මැල්කම් රංජිත් හිමිපාණන් කාදිනල් ධුරයට ඔසවා තැබීම මෙවර නත්තල වෙනුවෙන් අපට ලැබුණු සුවිශේෂී ත්‍යාගයක් ලෙස මම සළකමි.
දෙවි සමිඳුන් යදින ශුද්ධ වූ දේවස්ථාන භූමියේ දී පවා කොයි මොහොතක හෝ ප්‍රභාකරන්ගේ මරණ වරෙන්තුව ලියවේ යැයි බියෙන් සැක සංකාවෙන් විවෘත හදවතකින් නත්තල සමරන්නට නොහැකිව ගෙවී ගිය නත්තල් දින කොතෙක් නම් අපට තිබිණිද? නත්තල් මහා දිව්‍ය පූජාවට සහභාගි වන්නට හෝ දේවස්ථාන කරා පැමිණීමට නොහැකිව මරණ බියෙන් වෙලීගිය නත්තල් දින, කොතෙක් නම් මෙරට කිතුනු ජනතාව ගෙවා දමා ඇත්ද? තිස් වසරක අහේතුක යුද්ධය විසින් අප වෙතින් උදුරා ගනු ලැබූ ඒ ආදරණීය නත්තල ජාති, කුල, ආගම්, බේදයෙන් තොර වඩාත් අර්ථාන්විතව සැමරිය හැකි වටපිටාවක් මේ වනවිට නිර්මාණය වී තිබේ.
අතිගරු ජනාධිපති මහින්ද රාජපක්ෂ මැතිඳුන් ප්‍රමුඛ ත්‍රිවිධ රණසේවා විරුවන් තම ලේ, දහදිය, කඳුළු කැප කරමින් රට එක්සේසත් නොකරන්නට අපට තවමත් හුස්ම ගන්නට පවා සිදුවන්නේ අඩක් මළ මිනිසුන් ලෙසිනි. එහෙයින් මෙවර නත්තල් දිව්‍ය පූජාවේදී ඔවුන් වෙනුවෙන් ;මාහොතක් යාච්ඥා කරන්න! “දෙවියන් වහන්සේ ජීවමාන වන්නේ දිළින්ඳන්ගේ හදවත් තුළය” යන දේව වාක්‍යය යථාර්ථයක් බවට පත් කරමින් යේසුස් ක්‍රිස්තුස් වහන්සේගේ දේව සම්ප්‍රාප්තිය සඳහා දිළිඳු ගවලෙනක් තෝරා ගැනීමෙන් කිතු දහම අපට උගැන් වූ ගැඹුරු යථාර්ථය තම ජීවිත තුළට බද්ධ කර ගැනීමට හොඳම දිනය දැන් උදා වී තිබේ.
සාමය සමාදානය සපිරි සුබ නත්තලක් වේවා !
No comments:
Post a Comment